പ്രവാസികൾ

 ഉറക്കത്തിൽ മരിച്ചു പോയൊരു പ്രവാസിയെ കുറിച്ചു എഴുതണം എന്ന് നിനച്ചിരുന്നു...

അവനെക്കാൾ നിർഭാഗ്യവാന്മാർ അവന്റെ വീട്ടുകാരാണെന്നു പിന്നെയാണ് ഓർത്തത്...

അവന്റെ അസാന്നിധ്യം വീട്ടുകാർക്ക്  ഒരു നഷ്ടബോധം നൽകുകയില്ല...

കാരണം അവരുടെ മനസ്സിൽ അവനെപ്പോഴും  മറ്റൊരു രാജ്യത്തിലാണല്ലോ..

എന്നത്തേയും പോലെ "ആനുവൽ ലീവിന്" വേണ്ടി അവർ കാത്തിരിക്കും.... ആനുവൽ ലീവ് ഇല്ലാത്ത ലോകത്താണെന്ന് അവനെന്നു അവരപ്പോൾ ഓർത്തിരിക്കില്ല..

എന്നും വിളിക്കുന്ന നേരങ്ങളിൽ വരാത്ത "ഫോൺ കോളുകൾ ", ബ്ലു ടിക് വീഴാത്ത വാട്സ്ആപ്പ് മെസ്സേജുകൾ, അറ്റൻഡ് ചെയ്യപ്പെടാത്ത വീഡിയോ കോളുകൾ...

അതൊക്ക ആയിരിക്കും അവരെ കൂടുതൽj വിഷമപ്പെടുത്തുന്നത്...

ലോൺ അടക്കാനുള്ളത്, ചിട്ടി അടയ്ക്കാനുള്ളത്...

മരുന്നു വാങ്ങാനുള്ളത്..

അങ്ങനെ ചിലവുകളെല്ലാം അങ്ങനെ തന്നെ നിൽക്കും..

ചിലവുകൾക്കറിയില്ലല്ലോ ഉറക്കത്തിലെപ്പോഴോ യാത്ര പോയ സുഹൃത്തിനെ പറ്റി...

പ്രവാസികൾക്ക് ഒരിക്കലും മരണമില്ലല്ലോ അവരു ജീവിക്കുന്നത് എപ്പോഴും അവരുടെ വീട്ടുകാരുടെ മനസ്സുകളിലാണ്...

Random thoughts-6

ഓര്‍മ്മ

മരണത്തോടടുത്ത    മുത്തശ്ശി,
മറന്നു പോയവ ഓര്‍ത്തെടുത്തു
പറയുന്നു.....
ഒന്നും ഓര്‍ക്കാന്‍ നേരമില്ലാത്ത
നമ്മള്‍ അതിനെ "ഓര്‍മ്മക്കുറവെ"ന്ന്
പറയുന്നു....

കണ്ണാടി

കണ്ണാടിയുടെ നിറമെന്താണ്?
ചിലര്‍ക്ക് കാവി, ചിലര്‍ക്ക് ചുവപ്പ്..
ചിലര്‍ക്കത് ചന്ദ്രക്കലയുടെ വെള്ള...
ചിലര്‍ക്കത് സ്വര്‍ണക്കുരിശിന്റെ ശോഭ..
വിശക്കുന്നവര്‍ പിന്നെയും ചോദിച്ചേക്കാം??
കണ്ണാടിയുടെ നിറമെന്താണ്?

കാത്തിരിപ്പ് 
ശരീരവും മനസ്സും ചിന്തകളും പ്രവർത്തികളും പ്രാണനുമെല്ലാം ഓവർ ബ്രിഡ്ജിലൂടെ പായുമ്പോൾ...... ഓർമ്മകൾ മാത്രം നീ വരുന്നതും നോക്കി.... അടച്ചിട്ട റെയിൽ വെ ക്രോസിനരികിൽ നിന്നെയും കാത്തിരിക്കാറുണ്ട് ....

ദു:സ്വപ്നം
  
ചോര കണ്ടു മരവിച്ച മനസ്സിനെയും
ഭയപ്പെടുത്താന്‍  ഒരു 
ദു:സ്വപ്നത്തിന്റെ 
നിമിഷങ്ങള്‍ മതി

Hide n' Seek

പ്രിയപ്പെട്ട കവിയത്രീ....
കെട്ടുപിണഞ്ഞ വാക്കുകള്‍ക്കിടയില്‍
എത്ര മനോഹരമായിട്ടായിരുന്നു,
വാക്കുകള്‍ കൊണ്ട് നീ നിന്നെ,

എന്നിൽ നിന്നും ഒളിപ്പിച്ചു വെച്ചത്? 

Chat Conversation End

ചെമ്പരത്തി

ചെമ്പരത്തി

നീ എപ്പോഴും കണ്ടിരുന്നത്
വേലിപ്പടർപ്പുകളിൽ പടർന്നു ,
അഞ്ചിതളുകളിൽ ചുവപ്പ് നിറഞ്ഞ,
ഭ്രാന്തിന്റെ ചുവയുള്ള
ചെമ്പരത്തികളെ ആയിരുന്നു...

വെട്ടേറ്റു വീണിട്ടും
ചവിട്ടിയരക്കപ്പെട്ടിട്ടും
മണ്ണിൽ വീണ ഓരോ ചില്ലയിൽ നിന്നും
 പുതിയ  മുകുളങ്ങൾ പിറക്കുന്ന
ചെമ്പരത്തിയെ ആണ്
ഞാൻ കണ്ടിരുന്നത്..

ചുവപ്പ്...

അപകടങ്ങളുടെ,  അപായങ്ങളുടെ   അവസാനങ്ങളുടെ  നിറമാണ് ചുവപ്പെന്ന്  വിദ്യാലയങ്ങൾ  പഠിപ്പിച്ചത്..

പുലരികളിൽ പ്രതീക്ഷയുടെ ചുവന്ന തുടക്കമുണ്ടെന്ന്  പഠിപ്പിച്ചത് ചെമ്പരത്തി നിന്റെ പൂക്കളായിരുന്നു


ഭ്രാന്ത്


ഭ്രാന്തുള്ളവരാണ്  ചെമ്പരത്തി പൂക്കൾ ചെവിയിൽ ചൂടുന്നതെന്ന്  ആദ്യമായി പറഞ്ഞതാരായിരിക്കും...
അവരുടെ മുന്നിലൂടെ,  താളം തെറ്റിയ മനസ്സുമായി, ചെമ്പരത്തിപൂക്കൾ ചൂടി,  പോയതാരായിരിക്കും ????
ഒന്നുറപ്പാണ് ... അയ്യാളുടെ താളം തെറ്റാത്ത  ഓർമകളിലെവിടെയോ  പ്രിയപ്പെട്ട ഒരാൾക്കൊപ്പം  ചെമ്പരത്തി യും സ്ഥാനം പിടിച്ചിരിക്കുന്നുണ്ടാകും

പൂവുകള്‍ക്ക്...

ഇലകള്‍ കൊഴിയുന്ന
മാര്‍ച്ച് മാസങ്ങളില്‍ അന്ന്
വിദ്യാലയങ്ങളില്‍ നിന്നായിരുന്നു
നമ്മള്‍ യാത്ര പറഞ്ഞിറങ്ങിയത്..
പിന്നീട് പരസ്പരം  ജീവിതത്തില്‍ നിന്നും 

മനോഹരമായ ഒരു കവിതയോട്
ഉപമിക്കാന്‍ വയ്യ നിന്നെ...
കവിതകള്‍ നുണകളാണ്..
അടുക്കും ചിട്ടയിലും ഒതുക്കി വെക്കുന്ന
മനോഹരമായ നുണകള്‍...
 
ഒരു പത്തുമണിപ്പൂവിന്റെ
മനോഹാരിതയുണ്ട് നിനക്ക് ഇപ്പോഴും....
ഒരുസായന്തനത്തില്‍ ഒരുവാക്ക് പോലും
പറയാതെ കൊഴിഞ്ഞു പോകും അവര്‍....
നിറമാര്‍ന്ന ഒരു ഓര്‍മ്മ മാത്രം ബാക്കിയാകും..

ഞാന്‍ പിന്നെയും കാണുകയാണ് നിന്നെ....
ആദ്യമായ് കാണുന്ന പോലെ....
പിന്നെയും കണ്ടുകൊണ്ടിരിക്കുന്നു നിന്നെ...
എത്ര കണ്ടാലും മതി വരാത്ത പോലെ...


പൂക്കളുടെ നെടുവീര്‍പ്പിനും നിശബ്ദതക്കും
നിനവിനും കനവിനുമെല്ലാം
എന്തൊരു ഗന്ധമാണ്... അവ
നല്ലൊരു നാളെയുടെ പ്രതീക്ഷയാണ്..


നീ നല്‍കിയ നിമിഷങ്ങളും  ഞാനെടുത്ത
ഓര്‍മകളുമെല്ലാം പെയ്യുന്ന മഴയില്‍
നിന്റെ വേരുകള്‍ക്കൊരു വളമായി മാറിടട്ടെ..
ഒരായിരം പൂക്കളും വിരിഞ്ഞിടട്ടെ...

തിരക്കുകളെ കുറിച്ച്....

കാലം തെറ്റി, ദിക്ക് -
തെറ്റി, പെയ്യുന്ന മഴ
 പോലെ ആയിരുന്നു
നിന്റെ വാക്കുകള്‍..

ആകാശസീമകളില്‍നിന്ന്
ആഴക്കടലിലെക്കെന്ന പോലെ
 നിലയില്ലാതങ്ങനെ ഞാനും...

നിന്‍ കൈകോര്‍ത്തു,
ഈ മണ്ണിലൂടെ നടക്കാന്‍,
ഇനിയെത്ര ജന്മം നാം
മരിച്ചു ജനിക്കണം?

"ഒക്കെയും മറന്നതല്ലേ.. പിന്നെയും??"
കെറുവിച്ചു കൊണ്ടോരിക്കല്‍
നീ ചോദിച്ചു.....

മരുഭൂമിയില്‍ ഇപ്പോള്‍
മഴക്കാലമാണ് പെണ്ണെ....
ഓര്‍മകളുടെ പെയ്താണ് ..


എഴുതിത്തുടങ്ങാത്തൊരു,
കഥയാണ്‌ നമ്മള്‍...
ചുവപ്പ് മഷി കലങ്ങി-
പടര്‍ന്നൊരു ചെറുകഥ..

തനിച്ചിരിക്കുമ്പോഴോന്നു,
സ്വയം ചോദിച്ചു നോക്കണം...
ദിശ മാറിയോഴുകിയത്
ആര്‍ക്കു വേണ്ടിയെന്ന്....

മറന്നു തുടങ്ങിയെന്നു
കള്ളം പറയണം...
മുഖത്തൊരു കള്ളച്ചിരി
ചേര്‍ത്തു വെക്കണം...

അറിയാതെ പോയൊരു
മഴക്കാലത്തിന്നോര്‍മയ്ക്ക്...
ഇല്ലാത്ത തിരക്കുകളെ,
ഊതി വീര്‍പ്പിക്കാം നമുക്ക് ഇനി..

നമ്മൾ എന്താണ് ഇങ്ങനെ...

എന്തും തുറന്നു പറയാൻ അനുവാദമുണ്ടായിരുന്നിട്ടും നിന്നെ ഞാൻ സ്നേഹിക്കുന്നു എന്ന് പറയാൻ മാത്രം ഞാൻ മറന്നതെന്താകും....

ഒറ്റക്കിരുന്നപ്പോഴൊക്കെ കൂട്ടിരുന്നെങ്കിലും...
ജീവിതം മുഴുവനും കൂട്ടിരിക്കട്ടെ എന്ന് ചോദിക്കാതിരുന്നതെന്താകും...

പൂർവജന്മങ്ങളിൽ എപ്പോഴോ കണ്ടു മുട്ടിയിരുന്നിരിക്കണം നമ്മൾ..
ഓർമകളുടെ ഒരംശം എവിടെയോ ബാക്കി വെച്ചിരുന്നിരിക്കണം..

പിന്നെയും പിന്നെയും പിന്നെയും ഒറ്റ വാക്കിൽ
 ജീവിതത്തെ നമ്മൾ തളച്ചിടുന്നു..... വിധി.....

നീയും ഞാനും..

നിന്റെ നെറ്റിയിലെ ചന്ദനക്കുറി കണ്ടിട്ടാവണം പ്രകൃതിയും

വെയിലിനെ മഴയില്‍ ചാലിച്ചു നെറ്റിയില്‍ തോട്ടത്...




നീ അകലെയാണെന്നറിയുന്നതുകൊണ്ടാകും എന്നും
എന്റെ ഓര്‍മകളില്‍ നീ നിറയുന്നത്...
ഞാന്‍ അരികിലുണ്ടെന്നു നീ പറയുന്നതുകൊണ്ടാകും നിന്റെ
ഓര്‍മകളുടെ അരികില്‍ പോലും ഞാന്‍ ഇല്ലാത്തത്...




സമയം കിട്ടുമ്പോള്‍ നിന്റെ മനസ്സൊന്നു
തുറന്നു നോക്കണം....
എന്നില്‍ നിന്നും കാണാതെ പോയ വാക്കുകള്‍
അവിടെ ഒളിച്ചിരികുന്നോ എന്ന് നോക്കണം...




എന്നും നീ വരുന്നെന്നു എന്നോട് പറഞ്ഞിരുന്നത്
പത്തുമണിപ്പൂക്കള്‍ ആയിരുന്നു...
പിന്നെപ്പിന്നെ... പതിയെപ്പതിയെ അവയും
കള്ളം പറഞ്ഞു തുടങ്ങി.....




കണക്കില്‍ പെടാത്ത ഒരുപാട് നിമിഷങ്ങള്‍
നിനക്ക് തന്നിട്ടും.....
നിന്റെയത്ര ഞാന്‍ സ്നേഹിക്കുന്നില്ലെന്നു
നീ കണക്കു പറയുന്നു....

Random Thoughts 5

നന്ദി
ശിഖരങ്ങൾ മുറിച്ചു നഗ്നമാക്കിയ
കണിക്കോന്നകളിൽ
ഒരു വാശിയോടെ ഇതളുകൾ കിളിർക്കുന്നതും
പൂക്കൾ വിടരുന്നതും കാണാം...

പ്രകൃതിയുടെ ഈ പ്രവർത്തനത്തെ
 ഒരു മധുരപ്രതികാരമായ് കാണരുത്.....
അതിനുമപ്പുറം അതോരു നന്ദി പറച്ചിലാണ്...
കടയ്ക്കൽ വെക്കാമായിരുന്ന വാൾമുനയെ
ശിഖരങ്ങളിൽ മാത്രമോതുക്കിയതിന്.....

  ഓര്‍മ്മകള്‍ 

വേനലിലും
മലമുകളിലെ കാടിനുള്ളിൽ
ഒറ്റപ്പെട്ടൊരു മരം മാത്രം പൂത്തു നില്പുണ്ട്......
വസന്തത്തിലെപ്പൊഴോ,
ചില്ലകളിൽ കൊക്കുരുമ്മിയിരുന്ന
കിളികളുടെ പ്രണയത്തെ
ഓർത്തെടുക്കുകയാകും അത്

മിന്നാമിനുങ്ങുകൾ

സ്വപ്നങ്ങൾക്ക് ചിറക്
മുളച്ചതാണത്രെ മിന്നാമിനുങ്ങുകൾ....
ശരിയായിരുന്നിരിക്കണം..
പ്രതീക്ഷകളുടെ നുറുങ്ങുവെട്ടവും പേറി
എത്തിപ്പിടിക്കാവുന്നുയരത്തിൽ
അവ പറന്നകലാറുണ്ടല്ലോ...



ചിറകുകള്‍

 ചിറകുകളറ്റുപോയാൽ,
 മനോഹരമായ
ശലഭക്കുഞ്ഞുവരെ
പുഴുവാണ്...
ചവിട്ടിയരക്കപ്പെട്ടേക്കാവുന്ന
 വെറും പുഴു...

ഓർമ്മകൾ

അന്ന് നിന്നോടൊപ്പമുണ്ടായിരുന്ന
കുഞ്ഞ് കുഞ്ഞ് നിമിഷങ്ങളാണ്
ഇന്നത്തെ വലിയ വലിയ ഓർമ്മകൾ



ഓര്‍മ ദിനം 

ഓർമ്മദിനത്തിൽ
കല്ലറയ്ക്ക് മുകളിൽ
ആരോ വെച്ചിരിക്കുന്ന
വയലറ്റ് പൂക്കൾ....
തീർച്ചയാണ്...
ഭൂമിയിലെ സ്നേഹത്തിന്
മരണമില്ലെന്ന്..




കാത്തിരിപ്പ് 

ശരീരവും
മനസ്സും
ചിന്തകളും
പ്രവർത്തികളും
പ്രാണനുമെല്ലാം
ഓവർ ബ്രിഡ്ജിലൂടെ
പായുമ്പോൾ......
ഓർമ്മകൾ മാത്രം
നീ വരുന്നതും നോക്കി....
അടച്ചിട്ട
റെയിൽ വെ
ക്രോസിനരികിൽ
നിന്നെയും കാത്തിരിക്കാറുണ്ട് ...

ചോപ്പ് 

അസ്തമയ സൂര്യന്റ്റെ
അന്തിച്ചോപ്പിനേക്കാൾ
വർണാഭമാണ്
നിന്റ്റെ വിരലുകളിലെ
മൈലാഞ്ചിച്ചോപ്പ്...

 
 

Randome Thoughts 4

ഓർമ്മപ്പെടുത്തൽ

ചോറുവറ്റായിരുന്നു പ്രധാന ഒട്ടുസൂത്രം....

ഇൻസ്ട്രുമെൻ്റ്റ് ബോക്സ് വാളിൽ നിറയെ ടാറ്റൂസ്..
ബോക്സിന്റ്റെ അടിത്തട്ട് ആയിരുന്നു സേഫ് ലോക്കറും നിലവറയും

ബാഗിലെ ചെറുകള്ളികൾ രാശിക്കായക്കും തീപ്പെട്ടിപ്പടങ്ങൾക്കും റിസർവ് ചെയ്തത്..

ബട്ടൻസ് ഇല്ലാത്ത,  പുരണ്ടോരു യൂണിഫോം....
നടുപേജുകൾ കീറി നൂൽ അയഞ്ഞുപോയ ബുക്കുകൾ..

അവസാന പേജുകളിൽ, FLAME ഉം പിന്നെ തിരിച്ചറിയാനാകാത്ത വിധം പരുക്കേൽപ്പിച്ച നിന്റ്റെ പേരും

പെട്ടെന്ന് തീരാൻ പ്രാർത്ഥിച്ച കാലത്തെ , പെട്ടെന്ന് ചില വാക്കുകൾകോണ്ട് ഇങ്ങനേയുമോർക്കാം


Rear View Mirror

മാർച്ചിൽ, സൗഹൃദങ്ങൾ കൊഴിയുന്ന നാളുകളിൽ...
ഒാർമ്മക്കുറിപ്പിൽ നീ എഴുതി
തന്ന വരികളുണ്ട്...
വർഷങ്ങൾക്കു ശേഷവും, കഴിഞ്ഞുപോയ
നഷ്ടപ്പെടരുതാത്ത കാഴ്ചകളെ തിരികെ നൽകുന്ന
റിയർവ്യൂ മിറർ പോലെ...
Objects in the mirror are CLOSER than they APPEAR


ദയ

കായലിൽ ചീനവലയിടുയുന്നവൻ ആദ്യം കിട്ടിയ മീനുകളെ പ്ലാസ്ടിക് ബാഗിൽ ഇട്ടു ഭദ്രമായ് കെട്ടി സൂക്ഷിക്കുമ്പോൾ,

ഒരു വലിയ ജലാശയത്തിനു മുകളിൽ കിടന്നിട്ടും പ്രാണവായു കിട്ടാത്തവർ..

അതേ വലക്കാരൻ തന്നെയാണ് അടുത്ത വീശലിൽ കിട്ടിയ എണ്ണം കുറഞ്ഞ മീനുകളെ എടുക്കുവാൻ മെനക്കെടാതെ വല തിരികെയിടുന്നത്

ദയയുടെ പ്രായോഗിക മുഖമായിരിക്കുമാകും
.... അല്ല?????



ഹർത്താൽ

രാവിലെ അമ്പലത്തിൽ പോകാൻ
ഇറങ്ങിയപ്പോഴാണ് ദൈവം പറഞ്ഞത്

ഇന്ന് വരണ്ട മോനേ...
ഇവിടേം ഹർത്താലാ....

വായനശാല

പഴമയുടെ ഗന്ധം നിറഞ്ഞ കെട്ടിടത്തിനുള്ളില്‍...

സുഹറയും മജീദും ഒളിച്ചു കളിക്കുന്നുണ്ട്...

നൂറാനകളുടെ ശക്തിയുള്ള ഭീമസേനന്‍

തന്റെ മാനസിക വ്യഥകളാലുഴറുന്നുണ്ട്

വിനോധിനിയും മാഷും ഓര്‍മ്മകള്‍ അയവിറക്കുമ്പോള്‍

ഓര്‍മകളില്‍ പിന്നെയും ലോല നിറയും...

പാത്തുമ്മയുടെ ആട്  “ശബ്ദങ്ങള്‍” തിരയുമ്പോള്‍

ചെന്നപ്പറയന്റെ നായ ദീനമായി മോങ്ങും...

സംസാരിച്ചു കൊതി തീരാതെ നജീബ് കാറ്റിനോടും,

മരുഭൂമിയോടും ആടുകളോടും  കിന്നാരം പറയുന്നു

അഴീക്കോട് മാഷ്ന്റെ  പ്രസംഗ ഗര്‍ജ്ജനങ്ങള്‍...

സമര ആക്രോശങ്ങള്‍.. യുദ്ധ ചരിത്രങ്ങള്‍...

വാക്കുകള്‍ കൊണ്ട് ഒരു വസന്തം വിരിയുന്നുണ്ട് ഇവിടെ

വരികള്‍ക്ക് ചോരയുടെയും വിയര്‍പ്പിന്റെയും ഗന്ധവും

ഇത്രയേറെ ശബ്ദകോലാഹലങ്ങള്‍ നിറഞ്ഞിട്ടും

ഭിത്തിയിലെ ബോര്‍ഡില്‍... “നിശബ്ദത പാലിക്കണമത്രേ”

Random Thoughts-4

കവിത


ഒരു കവിത എഴുതണം
വൃത്തങ്ങള്‍ വൃത്തികേടാക്കാത്ത
അലങ്കാരങ്ങള്‍ അലങ്കോലപ്പെടുത്താത്ത
ലക്ഷണങ്ങള്‍ അപലക്ഷണമാവാത്ത
ഒരു മനോഹരമായ കവിത
ഒരേ ഒരു വായനക്കാരിക്ക് വേണ്ടി
മാത്രമെഴുതുന്ന കവിത

പെങ്ങളിലകള്‍

സ്നേഹിക്കാനും
തല്ലുപിടിക്കാനും
ചീത്ത പറയാനും 
കളിയാക്കാനും
വഴക്കുണ്ടാക്കാനും
സങ്കടം പറയാനും
ചില പെങ്ങളിലകള്‍
(inspired from d famous one)

മയില്‍‌പീലി

മാനം കാണാതെ സൂക്ഷിച്ചാല്‍
മയില്‍‌പീലി പെറ്റ് കൂട്ടുമെന്ന്
അവളോട്‌ കള്ളം പറഞ്ഞത് ഞാനാണ്‌

ആലിന്റെ തളിരില ആയിരത്തൊന്നു
ദിനങ്ങള്‍ ഉണക്കി സൂക്ഷിച്ചാല്‍...
അതില്‍ “കണ്ണനെ” കാണാമേന്നെന്നോട്
കള്ളം പറഞ്ഞത് അവളുമാണ്

ഓര്‍മക്കുറിപ്പുകളുടെ ഇതളുകളില്‍
ആയിരത്തൊന്നു ദിനവും കഴിഞ്ഞു
കണ്ണനെ കാത്തിരിക്കുന്നുണ്ട് ഒരു തളിരില

മാനം കാണാതിരുന്നിട്ടും മയില്‍‌പീലി
പെറ്റ് കൂട്ടിയില്ലെങ്കിലും ഒരുമിച്ചൊരു
 ജീവിതമെന്ന കനവുകളെ 
അവളിന്നും പെറ്റ് കൂട്ടുന്നുണ്ട്....

ശ്മശാനങ്ങളിലെ ആള്‍ക്കൂട്ടങ്ങള്‍.
 
ഒരിക്കല്‍
എന്റെ അനുവാദമില്ലാതെ..
ഞാന്‍ വഴി പറയാതെ ...
നീ എന്റെ വീട്ടിലെക്കെത്തും

നിന്റെ വരവിനെ
ആരും പ്രശ്നമാക്കാതെ ....
ആരും ഗൌനിക്കാതെ
നീയൊരു കാഴ്ചക്കാരിയാകും

അന്ന് ഒരുപക്ഷെ നിന്റെ
കണ്ണുകളിലെ ഡാമുകള്‍
എനിക്ക് വേണ്ടി തുറക്കപ്പെടും ..

അപ്പോള്‍ മാത്രമാകും
ഒരിക്കലെങ്കിലും തുറന്നു
പറയാത്ത പ്രണയത്തിന്റെ പേരില്‍
നിനക്ക് സ്വയം കുറ്റബോധം തോന്നുക

ഞാനപ്പോഴും നിശബ്ദനയിരിക്കും
നിന്റെ മൌനങ്ങളെ നേരിടാനില്ലാതെ
സൗഹൃദത്തിന്റെ മുഖംമൂടിയില്ലാതെ
വെറുമൊരു "ഞാന്‍" മാത്രമായിരിക്കും

സത്യങ്ങള്‍ 

ചില സത്യങ്ങളുണ്ട്
ശരീരത്തിന്...

എത്ര വെള്ളം കുടിച്ചാലും
നിറം മാറാത്തവ

മുറിവുകളിലൂടെ ഒഴുകി
വേദനിപ്പിക്കുന്നവ

ചില ബന്ധങ്ങള്പോലെ
പ്രണയങ്ങള്പോലെ...

ചില സത്യങ്ങളുണ്ട്
ശരീരത്തിന്....

കുടിക്കുന്ന വെള്ളത്തോടൊപ്പം
നിറം മാറുന്നവ

ഒഴിവാക്കലുകള് അനിവാര്യ-
മായ മാലിന്യങ്ങള്‍

ചില ബന്ധങ്ങള്പോലെ
പ്രണയങ്ങള്പോലെ...

ഇത്ര ലളിതമായി ശരീരം പുനരാ-
വിഷ്കരിക്കുന്നു ബന്ധങ്ങളെ... 
പ്രണയങ്ങളെ ...  

RANDOM THOUGHTS

കണ്ണട

കാലുകള്‍ക്കിടയിലെ

ലോകത്തെ

തിരയുന്നവര്‍ക്കിടയില്‍

കാലുകള്‍ക്കിടയിലൂടെ

ലോകത്തെ കാണുന്നു

ഒരു വയസ്സന്‍ കണ്ണട

ഗുല്‍മോഹര്‍

പ്രണയത്തിന്റെ പൂക്കള്‍റോസ് ആണെന്ന് ഞാന്‍

വേദനിപ്പിക്കുന്ന മുള്ളുകള്‍കഴിഞ്ഞ്...

സമരസപ്പെടലുകളുടെ ഇലകള്‍ക്ക് ശേഷം

ലഭിക്കുന്ന സുഖമാണ് പ്രണയം

പ്രണയത്തിന്റെ പൂക്കള്‍ഗുല്‍മോഹറെന്നവള്‍

ഹൃദയരക്തത്തിന് നിറം ചുവപ്പെങ്കില്‍

ഹൃദയത്തിലെ പ്രണയത്തിനും ചുവപ്പാണ്

വേനലില്‍ പൂക്കുന്ന, ചുവന്നു പൂക്കുന്ന

പ്രണയത്തിന്റെ ഗുല്‍മോഹറുകള്‍

എന്നും  എന്റെ റോസിന് മുകളില്‍പന്തലി-

ച്ചിരുന്നതവളുടെ ഗുല്‍മോഹറുകളായിരുന്നു.........

തെളിവ്

നേരം ഇരുണ്ടപ്പോള്‍ വഴി-

തെറ്റി എത്തിയൊരു മഴ...  

ഒരു ചാറ്റല്‍മഴ....

നേരം പുലര്‍ന്നപ്പോള്‍

ദുഷ്ടനായ മരുഭൂമി...

അവളെ  എവിടെ  നീ  ഒളിപ്പിച്ചു?

ഒരു തെളിവ് പോലും വെക്കാതെ,...

കാലന്‍കോഴി

തെക്കേ പറമ്പിലെ തേന്‍മാവിലിരു-

ന്നൊരു കാലന്‍കോഴി കൂവി.

ഉടനെ ഒരു മരണവാര്‍ത്ത കേള്‍ക്കും

മുത്തശ്ശന്‍നിര്‍വചിച്ചു...

മുറുക്കാന്‍ചവച്ചു കൊണ്ട് തലയാട്ടി

മുത്തശ്ശി അനുകൂലിച്ചു....

അടുക്കളയിലെ പണിക്കിടെ നാണിയമ്മ

തന്റെ അനുഭവം വിവരിച്ചു....

ആരായിരിക്കും എന്ന ഭാവത്തില്‍

അച്ഛനുമമ്മയും പരസ്പരം നോക്കി...

പേടിച്ചരണ്ട കുട്ടികള്‍കണ്ണുകളിറുക്കി..

പുതപ്പിനടിയില്‍ചുരുണ്ട് കൂടി

അടുക്കളയില്‍കയറാന്‍തക്കം പാര്‍ത്തിരുന്നു

മണിയന്‍പൂച്ച മാത്രം  ഓര്‍ത്തു....

അതിനും  വിശക്കുന്നുണ്ടാകും.....”

ആം ആദ്മി പാര്‍ട്ടി

അംഗത്വം തേടി ഒരു തത്ത ലീഗിലേക്ക്,  

ചുണ്ടിലെ ചുവപ്പ് മാറ്റിയാലംഗത്വമെന്നു നേതാവ്

യൂണിയനില്‍ ചെരണമേന്നൊരു തുമ്പിയോട്‌ നേതാക്കള്‍

ഇല്ലെങ്കില്‍ എടുക്കുന്ന കല്ലിനു നോക്കുകൂലി

ക്ഷേമനിധി കിട്ടാനൊരു മരംകൊത്തി ,

 മൂവരും ചെര്‍ന്നോരുമിചോരുക്കിയതൊരു ആം ആദ്മി പാര്‍ട്ടി

 (published in E-മഷി )

രണ്ടു കവിതകള്‍

പങ്ക്...

ലഭിച്ചതൊരു കഷണം കേക്ക് ആയിരുന്നു..

പ്ലം എന്നോ ടീ എന്നോ വകഭേദമില്ലാത്ത കേക്ക്

പങ്കു വെക്കേണ്ടത് അമ്മ ആയിരുന്നു..

അവിടെ ഏറ്റക്കുറവുകള്‍ക്ക് സ്ഥാനമില്ലല്ലോ

നാലായി മുറിക്കാം... എന്റെ അഭിപ്രായം....

ചെറിയ കുടുംബം.... സന്തുഷ്ടകുടുംബം....

“അഞ്ചെണ്ണം..”. ചേച്ചി പറഞ്ഞു...

അളിയന്റെ കാര്യം ഞാന്‍മറന്നു..

അമ്മ ആറായി മുറിച്ചു.... എന്റെ മനസ്സിലെ ചോദ്യ -

ചിഹ്നങ്ങള്‍ക്ക് പുറത്തുനിന്നൊരു കുര കേട്ടു..

എന്റെ പങ്ക് ഞൊടിയിടയില്‍അപ്രത്യക്ഷമായി..

തമോഗര്‍ത്തം താരത്തെ വിഴുങ്ങിയ പോലെ...

ചേച്ചിയുടെ പങ്ക് ഒളിപ്പിക്കപ്പെട്ടു... അളിയന്റെയും.

രണ്ടു പങ്കുമായി അച്ഛനും പുറത്തേക്ക്....

ആളൊഴിഞ്ഞ നേരം എന്റെ പാത്രത്തില്‍ ഒരു പകുതി..

 “അമ്മയുടെ പങ്കിലെ എന്റെ പങ്ക്...” 

ഉച്ചമരണങ്ങള്‍
~~~~~~~~~~~~~
വിജയത്തിലേക്ക് കുറുക്കുവഴികള്‍
ഇല്ലെന്നു പറഞ്ഞത് നീയായിരുന്നു

കുറുക്കുവഴികള്‍ മാത്രമുള്ള
വിജയമാണ് മരണമെന്ന് നീ ഓര്‍ത്തില്ല

ദിനം പ്രതി മരിച്ചു ജീവിക്കുന്നു ഞാന്‍...
ജീവിച്ചു മരിക്കാന്‍ കൊതിയാണെങ്കിലും...

ഉറക്കം ഒരു കൊച്ചു മരണമെത്രേ....
അപൂര്‍ണ്ണമായ, സുന്ദരമായ മരണം

എന്റെ മനസ്സേ... നീ എനിക്കെന്റെ
“മരണത്തെ” പോലും നിഷേധിക്കുന്നു....

ഇപ്പോള്‍ ഞാന്‍ ഓര്‍ക്കുന്നത് ജീവിച്ചു
തീര്‍ക്കാത്ത ജീവിതത്തെ കുറിച്ചാണ്

കുടിച്ചു തുടങ്ങാത്ത പ്രണയത്തെയും
ദാഹിച്ചു വലഞ്ഞ മനസ്സിനെയും...

നീ എന്ത് നിനയ്ക്കുന്നു പെണ്ണെ..
ഞാന്‍ കീഴടങ്ങി തുടങ്ങിയെന്നോ?...

നിനക്ക് തെറ്റി.... പൂര്‍ണമായും തെറ്റി...
ഞാന്‍  കുതിക്കുകയാണ്... വിജയത്തിലേക്ക്