Random Thoughts-4

കവിത


ഒരു കവിത എഴുതണം
വൃത്തങ്ങള്‍ വൃത്തികേടാക്കാത്ത
അലങ്കാരങ്ങള്‍ അലങ്കോലപ്പെടുത്താത്ത
ലക്ഷണങ്ങള്‍ അപലക്ഷണമാവാത്ത
ഒരു മനോഹരമായ കവിത
ഒരേ ഒരു വായനക്കാരിക്ക് വേണ്ടി
മാത്രമെഴുതുന്ന കവിത

പെങ്ങളിലകള്‍

സ്നേഹിക്കാനും
തല്ലുപിടിക്കാനും
ചീത്ത പറയാനും 
കളിയാക്കാനും
വഴക്കുണ്ടാക്കാനും
സങ്കടം പറയാനും
ചില പെങ്ങളിലകള്‍
(inspired from d famous one)

മയില്‍‌പീലി

മാനം കാണാതെ സൂക്ഷിച്ചാല്‍
മയില്‍‌പീലി പെറ്റ് കൂട്ടുമെന്ന്
അവളോട്‌ കള്ളം പറഞ്ഞത് ഞാനാണ്‌

ആലിന്റെ തളിരില ആയിരത്തൊന്നു
ദിനങ്ങള്‍ ഉണക്കി സൂക്ഷിച്ചാല്‍...
അതില്‍ “കണ്ണനെ” കാണാമേന്നെന്നോട്
കള്ളം പറഞ്ഞത് അവളുമാണ്

ഓര്‍മക്കുറിപ്പുകളുടെ ഇതളുകളില്‍
ആയിരത്തൊന്നു ദിനവും കഴിഞ്ഞു
കണ്ണനെ കാത്തിരിക്കുന്നുണ്ട് ഒരു തളിരില

മാനം കാണാതിരുന്നിട്ടും മയില്‍‌പീലി
പെറ്റ് കൂട്ടിയില്ലെങ്കിലും ഒരുമിച്ചൊരു
 ജീവിതമെന്ന കനവുകളെ 
അവളിന്നും പെറ്റ് കൂട്ടുന്നുണ്ട്....

ശ്മശാനങ്ങളിലെ ആള്‍ക്കൂട്ടങ്ങള്‍.
 
ഒരിക്കല്‍
എന്റെ അനുവാദമില്ലാതെ..
ഞാന്‍ വഴി പറയാതെ ...
നീ എന്റെ വീട്ടിലെക്കെത്തും

നിന്റെ വരവിനെ
ആരും പ്രശ്നമാക്കാതെ ....
ആരും ഗൌനിക്കാതെ
നീയൊരു കാഴ്ചക്കാരിയാകും

അന്ന് ഒരുപക്ഷെ നിന്റെ
കണ്ണുകളിലെ ഡാമുകള്‍
എനിക്ക് വേണ്ടി തുറക്കപ്പെടും ..

അപ്പോള്‍ മാത്രമാകും
ഒരിക്കലെങ്കിലും തുറന്നു
പറയാത്ത പ്രണയത്തിന്റെ പേരില്‍
നിനക്ക് സ്വയം കുറ്റബോധം തോന്നുക

ഞാനപ്പോഴും നിശബ്ദനയിരിക്കും
നിന്റെ മൌനങ്ങളെ നേരിടാനില്ലാതെ
സൗഹൃദത്തിന്റെ മുഖംമൂടിയില്ലാതെ
വെറുമൊരു "ഞാന്‍" മാത്രമായിരിക്കും

സത്യങ്ങള്‍ 

ചില സത്യങ്ങളുണ്ട്
ശരീരത്തിന്...

എത്ര വെള്ളം കുടിച്ചാലും
നിറം മാറാത്തവ

മുറിവുകളിലൂടെ ഒഴുകി
വേദനിപ്പിക്കുന്നവ

ചില ബന്ധങ്ങള്പോലെ
പ്രണയങ്ങള്പോലെ...

ചില സത്യങ്ങളുണ്ട്
ശരീരത്തിന്....

കുടിക്കുന്ന വെള്ളത്തോടൊപ്പം
നിറം മാറുന്നവ

ഒഴിവാക്കലുകള് അനിവാര്യ-
മായ മാലിന്യങ്ങള്‍

ചില ബന്ധങ്ങള്പോലെ
പ്രണയങ്ങള്പോലെ...

ഇത്ര ലളിതമായി ശരീരം പുനരാ-
വിഷ്കരിക്കുന്നു ബന്ധങ്ങളെ... 
പ്രണയങ്ങളെ ...  

RANDOM THOUGHTS

കണ്ണട

കാലുകള്‍ക്കിടയിലെ

ലോകത്തെ

തിരയുന്നവര്‍ക്കിടയില്‍

കാലുകള്‍ക്കിടയിലൂടെ

ലോകത്തെ കാണുന്നു

ഒരു വയസ്സന്‍ കണ്ണട

ഗുല്‍മോഹര്‍

പ്രണയത്തിന്റെ പൂക്കള്‍റോസ് ആണെന്ന് ഞാന്‍

വേദനിപ്പിക്കുന്ന മുള്ളുകള്‍കഴിഞ്ഞ്...

സമരസപ്പെടലുകളുടെ ഇലകള്‍ക്ക് ശേഷം

ലഭിക്കുന്ന സുഖമാണ് പ്രണയം

പ്രണയത്തിന്റെ പൂക്കള്‍ഗുല്‍മോഹറെന്നവള്‍

ഹൃദയരക്തത്തിന് നിറം ചുവപ്പെങ്കില്‍

ഹൃദയത്തിലെ പ്രണയത്തിനും ചുവപ്പാണ്

വേനലില്‍ പൂക്കുന്ന, ചുവന്നു പൂക്കുന്ന

പ്രണയത്തിന്റെ ഗുല്‍മോഹറുകള്‍

എന്നും  എന്റെ റോസിന് മുകളില്‍പന്തലി-

ച്ചിരുന്നതവളുടെ ഗുല്‍മോഹറുകളായിരുന്നു.........

തെളിവ്

നേരം ഇരുണ്ടപ്പോള്‍ വഴി-

തെറ്റി എത്തിയൊരു മഴ...  

ഒരു ചാറ്റല്‍മഴ....

നേരം പുലര്‍ന്നപ്പോള്‍

ദുഷ്ടനായ മരുഭൂമി...

അവളെ  എവിടെ  നീ  ഒളിപ്പിച്ചു?

ഒരു തെളിവ് പോലും വെക്കാതെ,...

കാലന്‍കോഴി

തെക്കേ പറമ്പിലെ തേന്‍മാവിലിരു-

ന്നൊരു കാലന്‍കോഴി കൂവി.

ഉടനെ ഒരു മരണവാര്‍ത്ത കേള്‍ക്കും

മുത്തശ്ശന്‍നിര്‍വചിച്ചു...

മുറുക്കാന്‍ചവച്ചു കൊണ്ട് തലയാട്ടി

മുത്തശ്ശി അനുകൂലിച്ചു....

അടുക്കളയിലെ പണിക്കിടെ നാണിയമ്മ

തന്റെ അനുഭവം വിവരിച്ചു....

ആരായിരിക്കും എന്ന ഭാവത്തില്‍

അച്ഛനുമമ്മയും പരസ്പരം നോക്കി...

പേടിച്ചരണ്ട കുട്ടികള്‍കണ്ണുകളിറുക്കി..

പുതപ്പിനടിയില്‍ചുരുണ്ട് കൂടി

അടുക്കളയില്‍കയറാന്‍തക്കം പാര്‍ത്തിരുന്നു

മണിയന്‍പൂച്ച മാത്രം  ഓര്‍ത്തു....

അതിനും  വിശക്കുന്നുണ്ടാകും.....”

ആം ആദ്മി പാര്‍ട്ടി

അംഗത്വം തേടി ഒരു തത്ത ലീഗിലേക്ക്,  

ചുണ്ടിലെ ചുവപ്പ് മാറ്റിയാലംഗത്വമെന്നു നേതാവ്

യൂണിയനില്‍ ചെരണമേന്നൊരു തുമ്പിയോട്‌ നേതാക്കള്‍

ഇല്ലെങ്കില്‍ എടുക്കുന്ന കല്ലിനു നോക്കുകൂലി

ക്ഷേമനിധി കിട്ടാനൊരു മരംകൊത്തി ,

 മൂവരും ചെര്‍ന്നോരുമിചോരുക്കിയതൊരു ആം ആദ്മി പാര്‍ട്ടി

 (published in E-മഷി )

രണ്ടു കവിതകള്‍

പങ്ക്...

ലഭിച്ചതൊരു കഷണം കേക്ക് ആയിരുന്നു..

പ്ലം എന്നോ ടീ എന്നോ വകഭേദമില്ലാത്ത കേക്ക്

പങ്കു വെക്കേണ്ടത് അമ്മ ആയിരുന്നു..

അവിടെ ഏറ്റക്കുറവുകള്‍ക്ക് സ്ഥാനമില്ലല്ലോ

നാലായി മുറിക്കാം... എന്റെ അഭിപ്രായം....

ചെറിയ കുടുംബം.... സന്തുഷ്ടകുടുംബം....

“അഞ്ചെണ്ണം..”. ചേച്ചി പറഞ്ഞു...

അളിയന്റെ കാര്യം ഞാന്‍മറന്നു..

അമ്മ ആറായി മുറിച്ചു.... എന്റെ മനസ്സിലെ ചോദ്യ -

ചിഹ്നങ്ങള്‍ക്ക് പുറത്തുനിന്നൊരു കുര കേട്ടു..

എന്റെ പങ്ക് ഞൊടിയിടയില്‍അപ്രത്യക്ഷമായി..

തമോഗര്‍ത്തം താരത്തെ വിഴുങ്ങിയ പോലെ...

ചേച്ചിയുടെ പങ്ക് ഒളിപ്പിക്കപ്പെട്ടു... അളിയന്റെയും.

രണ്ടു പങ്കുമായി അച്ഛനും പുറത്തേക്ക്....

ആളൊഴിഞ്ഞ നേരം എന്റെ പാത്രത്തില്‍ ഒരു പകുതി..

 “അമ്മയുടെ പങ്കിലെ എന്റെ പങ്ക്...” 

ഉച്ചമരണങ്ങള്‍
~~~~~~~~~~~~~
വിജയത്തിലേക്ക് കുറുക്കുവഴികള്‍
ഇല്ലെന്നു പറഞ്ഞത് നീയായിരുന്നു

കുറുക്കുവഴികള്‍ മാത്രമുള്ള
വിജയമാണ് മരണമെന്ന് നീ ഓര്‍ത്തില്ല

ദിനം പ്രതി മരിച്ചു ജീവിക്കുന്നു ഞാന്‍...
ജീവിച്ചു മരിക്കാന്‍ കൊതിയാണെങ്കിലും...

ഉറക്കം ഒരു കൊച്ചു മരണമെത്രേ....
അപൂര്‍ണ്ണമായ, സുന്ദരമായ മരണം

എന്റെ മനസ്സേ... നീ എനിക്കെന്റെ
“മരണത്തെ” പോലും നിഷേധിക്കുന്നു....

ഇപ്പോള്‍ ഞാന്‍ ഓര്‍ക്കുന്നത് ജീവിച്ചു
തീര്‍ക്കാത്ത ജീവിതത്തെ കുറിച്ചാണ്

കുടിച്ചു തുടങ്ങാത്ത പ്രണയത്തെയും
ദാഹിച്ചു വലഞ്ഞ മനസ്സിനെയും...

നീ എന്ത് നിനയ്ക്കുന്നു പെണ്ണെ..
ഞാന്‍ കീഴടങ്ങി തുടങ്ങിയെന്നോ?...

നിനക്ക് തെറ്റി.... പൂര്‍ണമായും തെറ്റി...
ഞാന്‍  കുതിക്കുകയാണ്... വിജയത്തിലേക്ക്

അറബിക്കഥ

ഇതൊരു കുഞ്ഞു അനുഭവക്കുറിപ്പാണ്.. എന്റെ ജീവിതത്തില്‍ നടന്നത്... വായിക്കുന്നവര്‍ക്ക് ചിലപ്പോള്‍ "പുതിയ കുപ്പിയിലെ പഴയ വീഞ്ഞ്" ആയി തോന്നാം... എന്നാലും ഒരു സന്ദേശം ഉണ്ടെന്നു തോന്നുന്നത് കൊണ്ട് ഞാന്‍ കുറിക്കുന്നു .


 ഒരു വെള്ളിയാഴ്ച  റൂമിലെ എല്ലാവരും അവരവരുടേതായ തിരക്കുകളില്‍ മുഴുകി ഇരിക്കുകയായിരുന്നു.. റൂമിലെ "ഇക്ക" , അല്പം തുറന്നു പറയട്ടെ.... 3gp ക്ലിപ്പ് കാണുകയായിരുന്നു... അത് സ്കൂള്‍ വിദ്യാര്‍ത്ഥിനികളുടെതും..... കാണുന്നതിനിടയ്ക്ക് അദ്ദേഹം പുലഭ്യം പറയുന്നുമുണ്ട്.... ഇത് കേട്ട് വേറെ ഒരു ചങ്ങാതി  ചോദിച്ചു..
" എന്താ ഇക്ക പ്രശ്നം?  കുറച്ചു നേരമായല്ലോ തെറി വിളി തുടങ്ങീട്ട്?"

"ഈ  ^#%@&#%& മക്കള്‍ക്കൊക്കെ എന്തിന്റെ ^$^$*&%^ ??? കണ്ടില്ലേ ഓരോന്ന് കാട്ടിക്കൂട്ടണതു?"

"എന്താ ഇക്കാ?"

" സ്കൂളില്‍ പഠിക്കണ പിള്ളേര്‍ ആണെടാ... ഇവളുമാര്‍ക്കൊക്കെ അഹങ്കാരമാ....... സ്കൂളില്‍ പോകുന്നതിന്റെ.... അതോണ്ടാ ഇങ്ങനെ ഒക്കെ.. ആരേം പേടിയില്ല... വീട്ടുകാരേം...."  "ഇവളെ ഒക്കെ പഠിപ്പ് നിര്‍ത്തി കെട്ടിച് വിടണം... അല്ലേലും പെമ്പിള്ളേര്‍ ഒന്നും അധികം പഠിക്കേണ്ട ആവശ്യം ഇല്ല"
ഇക്ക അങ്ങ് തുള്ളുകയാണ്

 ഇത് കേട്ടപ്പോ ഞാന്‍ ചോദിച്ചു..

" അതെന്താ ഇക്കാ അങ്ങനെ പറഞ്ഞെ? പിള്ളേരെ പിന്നെ സ്കൂളില്‍ വിടണ്ടേ?"

 "എന്തിനാ സ്കൂളില്‍ വിട്ടിട്ട്? ഇതേ പോലെ കാണിക്കാനോ ? എല്ലാത്തിനേം പിടിച്ചു കെട്ടിച്ചു വിടണം.. അപ്പോഴേ തീരുള്ള് ഇവരടെ................... എന്റെ കൊച്ചിനെ പതിനഞ്ചു വയസ്സാകുമ്പോഴേക്കും  ഞാന്‍ കെട്ടിച്ചു വിടും.........."

"ഒന്നോ രണ്ടോ പെണ്‍കുട്ടികള്‍ ഇങ്ങനെ പോയി എന്ന് വെച്ച് എല്ലാ കുട്ടികളെയും അങ്ങനെ കാണുന്നത് മോശമാണ് ഇക്കാ ..."

"നിനക്ക് അങ്ങനെ ഒക്കെ പറയാം...  നമ്മടെ ഒരു ഫ്രണ്ട്ന്റെ  പെങ്ങളുടെ മോള്.... പതിനഞ്ചു വയസ്സേ ഉള്ളു....  പക്ഷെ വല്ല്യ പെണ്ണായി...  ഒരുമാതിരി ബനിയന്‍ ഒക്കെ ഇട്ടു കുറെ ചെക്കന്മാരുടെ കൂടെ നടക്കുന്നു..... ഞാന്‍ അതെ പോലെ തന്നെ അവനോടു പറഞ്ഞു... പഠിപ്പ് നിര്‍ത്തി പിറ്റേ ആഴ്ച അവളുടെ കല്യാണം നടത്തി..."

" പതിനഞ്ചു വയസ്സിലോ??? ആ കൊച്ചിന്റെ ജീവിതം കൂടി നശിപ്പിച്ചു അല്ലെ?"

"ഇപ്പൊ അവള്‍ സുഖമായി ജീവിക്കുന്നു... അല്ലേലും ഈ പെമ്പിള്ളേര്‍ എന്തിനാ പഠിക്കുന്നത്? എന്തായാലും കല്യാണം കഴിച്ചു വിടാന്‍ ഉള്ളതാണ്.. എത്രയും വേഗം നടത്തി അയക്കണം... അല്ലാതെ പടിപ്പിക്കാനോക്കെ നോക്കിയാല്‍ ഇതേ പോലെ മൊബൈലില്‍ ഒക്കെ കാണേണ്ടതായി വരും... മ്മടെ കുട്ടീനെ എത്രയും വേഗം കെട്ടിച്ചു വിടും...  "

"ഇക്കയുടെ മോളെ എപ്പോ വേണെമെങ്കിലും ഇക്കാക്ക് കെട്ടിച്ചു വിടാം.. അതൊക്കെ ഇക്കയുടെ ഇഷ്ടമാണ്... അത്യാവശ്യ വിദ്യാഭ്യാസം എങ്കിലും  ആ കൊച്ചിന് കൊടുക്കുകയെങ്കിലും ചെയ്യ്‌ ഇക്ക.." എന്ന് പറഞ്ഞു ഞാന്‍ നിര്‍ത്തി..


പിന്നെ ഇക്കയോട് ഞാന്‍ എന്ത് പറഞ്ഞിട്ടും കാര്യമില്ലായിരുന്നു.. എത്ര പറഞ്ഞിട്ടും ആള്‍  സമ്മതിക്കുകയും  ഇല്ല...  ആ കുട്ടിയുടെ യോഗം എന്ന് കരുതി ഞാന്‍ പിന്നെ ഒന്നും മിണ്ടിയില്ല..... " വിവാഹത്തെക്കാളും അത്യാവശ്യം വിദ്യാഭ്യാസം ആണെന്ന് "  ആളെ പറഞ്ഞു മനസ്സിലാക്കിക്കാന്‍ പറ്റിയില്ലല്ലോ എന്നോര്‍ത്തപ്പോ ... എന്തോ പോലെ തോന്നി.....ഇങ്ങനെ  മറ്റുള്ളവരോട് സംസാരിച്ചു തോല്‍ക്കുമ്പോള്‍ ....... അതൊരു നല്ല കാര്യത്തിനു വേണ്ടി ആയിട്ടും..... ഞാന്‍ പിന്നെ അത് വിട്ടുകളഞ്ഞു.. എന്തേലുമാവട്ടെ... അവരും അവരുടെ മകളും..... നമ്മക്കെന്ത് കാര്യം???....



കുറച്ചു ദിവസങ്ങള്‍ക്കു ശേഷം ഞാന്‍ ഡ്യൂട്ടി കഴിഞ്ഞു റൂമിലെത്തിയപ്പോള്‍  ഇക്കയും വേറെ ഒരു സുഹൃത്തും ഉണ്ടായിരുന്നു അവിടെ....   ഇക്ക കലപില കലപില ന്നു സംസാരിച്ചു കൊണ്ടിരിക്കുകയായിരുന്നു. കയ്യില്‍ ഒരു മൊബൈലും ഉണ്ടായിരുന്നു. എന്തോ ഒരു തമാശ വഴക്ക് പോലെ.... ഞാന്‍ ചോദിച്ചു...

"എന്താ ഇക്ക ഇന്നത്തെ പ്രശനം?"

"ഞാന്‍ ഇവനോട് ഈ മെസ്സേജ്  എങ്ങനെയാ എഴുതുന്നത് എന്ന് ചോദിച്ചിട്ട് പറഞ്ഞു തരണില്ല ഡാ "

ഞാന്‍ കൂട്ടുകാരനോട് ചോദിച്ചു..

" എന്തെടാ നഹാസേ നീ ഇക്കാക്ക് സ്പെല്ലിംഗ് പറഞ്ഞു കൊടുക്കാതെ?
.
" അങ്ങേര്‍ക്ക് വല്ല്യ ജാഡ ആണെടാ... നമ്മ പറഞ്ഞു കൊടുത്താല്‍ അപ്പൊ പറയും എനിക്കറിയാമായിരുന്നു.. പിന്നെ ചുമ്മാ ചോദിച്ചൂന്നെ ഉള്ളു എന്ന്... അങ്ങനെ അറിയാവുന്ന ആളാണേല്‍ അങ്ങ് തനിയെ എഴുതിക്കോട്ടെ..."

ഇത് കേട്ടപ്പോള്‍ ഇക്ക ഇടയില്‍ കയറി പറഞ്ഞു...

" അവന്‍ ഡിഗ്രി വരെ പഠിച്ചതല്ലേ... അതുകൊണ്ടാ അവനോടു ചോദിച്ചേ.... നമ്മള് എഴാം ക്ലാസ്സു വരെ പഠിച്ചിട്ടുള്ളൂ.... വിദ്യാഭ്യാസമൊന്നും ഇല്ലാത്ത ആളാണ്... അപ്പൊ പഠിച്ചവര്‍ അല്ലെ പറഞ്ഞു തരേണ്ടത്?"

ഇക്ക അങ്ങനെ അവനെ പറഞ്ഞു വെറുപ്പിക്കുകയാണ്... ഞാന്‍ ഈ സംസാരം കേട്ട് കുറച്ചു നേരം മിണ്ടാതെ ഇരുന്നു...... പെട്ടെന്ന്  ഞാന്‍ ഇക്കയോടായി പറഞ്ഞു...

"ഇക്കാ ഇക്കയുടെ  ഈ അവസ്ഥ ഭാവിയില്‍ ഇക്കയുടെ മക്കള്‍ക്ക് ഉണ്ടാകാതെ ഇരിക്കട്ടെ... പ്രത്യേകിച്ച് പെണ്‍കുട്ടിക്ക്..."

മനസ്സിലാവാത്ത പോലെ " ഏതു അവസ്ഥ?"

"ഇപ്പൊ കണ്ടില്ലേ? ഈ  ഒരു കുഞ്ഞു മെസ്സേജ് എഴുതാന്‍ വേണ്ടി വേറെ ഒരാളുടെ സഹായം വേണ്ടി വന്നു.. എന്നിട്ട് ഇക്കാക്ക്‌ അത് കിട്ടിയോ? അതും ഇല്ല... നാണം കേട്ടു എന്നല്ലാതെ വേറെ ഗുണം ഒന്നും ഉണ്ടായില്ല... ഭാവിയില്‍ അവള്‍ക്കും ഇതേപോലെ എന്തേലും എഴുതേണ്ട അവസ്ഥ വരുമ്പോ ഇതേപോലെ വേറെ ഒരാളോട് ചോദിക്കേണ്ടി വരരുത് ഇക്ക. അത് വളരെ മോശമാണ് ഇക്കാ കുട്ടികള്‍ എന്തെങ്കിലും വായിച്ചു മനസ്സിലാക്കാനോ എഴുതാനോ മറ്റൊരാളുടെ സഹായം തേടുന്നത് അതും സ്കൂളുകളും മറ്റും ഇത്ര അധികം ഉള്ള ഈ കാലത്ത്...."

"നീ ആ പറഞ്ഞത് കാര്യമാ"

"ഞാന്‍ അന്ന് പറഞ്ഞതും കാര്യമാ ഇക്കാ... ഇക്കാക്ക് അന്ന് മനസ്സിലായില്ല... അന്ന് ഇക്ക എന്തൊക്കെയോ പറഞ്ഞു....  ഇക്കാ, ഇക്കയുടെ കുഞ്ഞോളേ അത്യാവശ്യം ഡിഗ്രി വരെ എങ്കിലും പഠിപ്പിക്ക് ഇക്കാ. അവര്‍ക്ക് നല്ലൊരു ജോലി ആവട്ടെ, സ്വന്തം കാലില്‍ നിക്കട്ടെ  അതിനു ശേഷം എന്താണെന്നു വെച്ചാല്‍ ആയിക്കോ. ഒന്നും പറ്റിയില്ലെങ്കില്‍ സ്വന്തം കുട്ടികള്‍ക്ക് എന്തെങ്കിലും പറഞ്ഞു കൊടുക്കാനുള്ള വിദ്യാഭ്യാസമെങ്കിലും കിട്ടട്ടെ... അല്ലാതെ  പതിനഞ്ചു വയസ്സാകുമ്പോഴേക്കും കെട്ടിച്ചു വിടാതെ...

പിന്നെ ഇക്ക കൂടുതലൊന്നും പറഞ്ഞില്ല..... പറയേണ്ട രീതിയില്‍ പറഞ്ഞപ്പോ ആള്‍ക്ക് കാര്യം മനസ്സിലായി....  ഇനി എന്ത് വേണമെങ്കിലും ഇക്കാക്ക്‌ ചെയ്യാം... പക്ഷെ ആളെ പറഞ്ഞു മനസ്സിലാക്കി കൊടുക്കേണ്ട ചുമതലെയേ എനിക്ക് ഉണ്ടായിരുന്നുള്ളു.... അത് നടന്നു.....

വിവാഹം കഴിപ്പിച്ചു അയക്കേണ്ടത്
പ്രായപൂര്‍ത്തി ആയ ശരീരത്തെ മാത്രമല്ല
പ്രായപൂര്‍ത്തി ആയ ഒരു മനസ്സിനെ കൂടെ ആവണം....
എന്നാലെ കൂടുമ്പോള്‍ ഇമ്പമുണ്ടാകുകയുള്ളൂ....
കുടുംബമാകുകയുള്ളൂ

തീവണ്ടി

സൗകര്യങ്ങള്‍ക്കനുസരിച്ച് മാറി-
മറിഞ്ഞോടുന്നു തീവണ്ടികള്‍....

കല്‍ക്കരി തിന്നും ചുമച്ചു തുപ്പിയും
ചിലയിടത്ത് കറന്റടിച്ചു കൂകിപാഞ്ഞും...

നെഞ്ചിലൊരു “കനലാഴി എരിയുന്നെങ്കിലും”
യാത്രകള്‍സുഗമമാക്കുന്നവര്‍..

തുരങ്കങ്ങളിലും മറ്റു പ്രതിസന്ധികളിലും
ഒരുമിച്ചുള്ളവര്‍... ഒരു കുടുംബം പോലെ..

കാണുന്നവരില്‍കണ്ണുനീരും നെഞ്ചില്‍ സഹതാപവും
നിറച്ചു പാളം തെറ്റുന്നു “ചില വണ്ടികള്‍”...

ഇടറുന്ന ചൂളം വിളികള്‍, ഉയരുന്ന അപശബ്ദങ്ങള്‍
അടരുന്ന കണ്ണികള്‍, ഉലയുന്ന ബന്ധങ്ങള്‍

ചില വണ്ടികള്‍ നിന്നു കൊടുക്കുന്നു മറ്റുള്ളവയ്ക്ക്-
വേണ്ടി....... ക്ഷമിച്ചു ശീലിക്കുന്നു..

എങ്കിലും, ഇടയ്ക്കെപ്പോഴോ ചങ്ങല വലിച്ച്
ഇറങ്ങിപോയ സ്നേഹിതാ, അറിയുന്നുവോ നീ?

നീ അവസാനിപ്പിച്ചത് നിന്റെ യാത്ര മാത്രമാണെന്ന്...
മറ്റുള്ളവര്‍ഇപ്പോഴും ചലിക്കുന്നു അതെ താളത്തില്‍..

Random Thoughts 2

ഇതളുകള്‍

നിന്നെക്കുറിച്ചു എഴുതി തുടങ്ങിയത് 
ആദ്യ പേജുകളില്‍ആയിരുന്നു....

അവസാന പേജുകളില്‍നിന്ന്
എന്നെക്കുറിച്ചും.......

ഇപ്പോഴും വലിച്ചു കീറാത്ത
നടുപെജുകള്‍നമ്മുക്കിടയില്‍ഇന്നും..........

തിരിച്ചറിവുകള്‍‍"

ചില അറിവുകള്‍

നമ്മള്‍വളരെ വൈകി .

അറിയുന്നത് കൊണ്ടാകും 
അവയെ നമ്മള്‍

“തിരിച്ചറിവുകള്‍"

എന്ന് പറയുന്നത്....

നരകം


ഭൂമി ഒരു നരകമാണ്. 
തല കീഴായി തൂക്കിയിട്ടു വളര്‍ത്തി, 
കല്ലെറിഞ്ഞു വീഴ്ത്തി, 
തല ഉരിച്ചെടുത്തതും പോരാതെ, 
ചുട്ടെരിച്ചതും, പിന്നെ തല്ലി-
പ്പോളിക്കുകയും ചെയ്യപ്പെട്ടെ 
കശുവണ്ടി ചൊല്ലി ഈ –
ഭൂമി ഒരു നരകമാണ്...

കിണര്‍

പ്രായം തികഞ്ഞിട്ടും 
കെട്ടിക്കാന്‍ആളില്ലാതെ 
“പുര നിറഞ്ഞു” നില്പുണ്ട് 
തൊടിയിലൊരു പൊട്ടക്കിണര്‍...

തുകല്‍

വീഥിയില്‍, പായുന്ന ടയറുകള്‍ 
ഒരു തുകലുപോല്‍പരത്തിയെ-
-ടുക്കുന്നുണ്ട്, ഇന്നലെകളില്‍,
കാണുമ്പോള്‍കുരച്ചടുതെത്തിയ 
നായക്കുട്ടിയെ.......

അരണ

ഏറ്റവും മനോഹരമായ

മറവികളിലോന്നാണ്

അരണയുടെത്.

“ഇര”യുടെ ശരീരത്തിലേക്ക്

വിഷപ്പല്ലുകള്

ആഞ്ഞിറക്കുന്നതിനു മുന്പ്

ദൈവം സൃഷ്‌ടിച്ച

മനോഹരമായ മറവി...

മനുഷ്യനു നല്കാന്

മറന്നു പോയൊരു “മറവി”.